Bhaktivedanta Library


9.1		śrī-bhagavān uvāca .idaṁ tu te guhya-tamaṁ .pravakṣyāmy anasūyave .jñānaṁ vijñāna-sahitaṁ .yaj jñātvā mokṣyase ’śubhāt
9.2		rāja-vidyā rāja-guhyaṁ .pavitram idam uttamam .pratyakṣāvagamaṁ dharmyaṁ .su-sukhaṁ kartum avyayam
9.3		aśraddadhānāḥ puruṣā .dharmasyāsya paran-tapa .aprāpya māṁ nivartante .mṛtyu-saṁsāra-vartmani
9.4		mayā tatam idaṁ sarvaṁ .jagad avyakta-mūrtinā .mat-sthāni sarva-bhūtāni .na cāhaṁ teṣv avasthitaḥ
9.5		na ca mat-sthāni bhūtāni .paśya me yogam aiśvaram .bhūta-bhṛn na ca bhūta-stho .mamātmā bhūta-bhāvanaḥ
9.6		yathākāśa-sthito nityaṁ .vāyuḥ sarvatra-go mahān .tathā sarvāṇi bhūtāni .mat-sthānīty upadhāraya
9.7		sarva-bhūtāni kaunteya .prakṛtiṁ yānti māmikām .kalpa-kṣaye punas tāni .kalpādau visṛjāmy aham
9.8		prakṛtiṁ svām avaṣṭabhya .visṛjāmi punaḥ punaḥ .bhūta-grāmam imaṁ kṛtsnam .avaśaṁ prakṛter vaśāt
9.9		na ca māṁ tāni karmāṇi .nibadhnanti dhanañ-jaya .udāsīna-vad āsīnam .asaktaṁ teṣu karmasu
9.10		mayādhyakṣeṇa prakṛtiḥ .sūyate sa-carācaram .hetunānena kaunteya .jagad viparivartate
9.11		avajānanti māṁ mūḍhā .mānuṣīṁ tanum āśritam .paraṁ bhāvam ajānanto .mama bhūta-maheśvaram
9.12		moghāśā mogha-karmāṇo .mogha-jñānā vicetasaḥ .rākṣasīm āsurīṁ caiva .prakṛtiṁ mohinīṁ śritāḥ
9.13		mahātmānas tu māṁ pārtha .daivīṁ prakṛtim āśritāḥ .bhajanty ananya-manaso .jñātvā bhūtādim avyayam
9.14		satataṁ kīrtayanto māṁ .yatantaś ca dṛḍha-vratāḥ .namasyantaś ca māṁ bhaktyā .nitya-yuktā upāsate
9.15		jñāna-yajñena cāpy anye .yajanto mām upāsate .ekatvena pṛthaktvena .bahudhā viśvato-mukham
9.16		ahaṁ kratur ahaṁ yajñaḥ .svadhāham aham auṣadham .mantro ’ham aham evājyam .aham agnir ahaṁ hutam
9.17		pitāham asya jagato .mātā dhātā pitāmahaḥ .vedyaṁ pavitram oṁ-kāra .ṛk sāma yajur eva ca
9.18		gatir bhartā prabhuḥ sākṣī .nivāsaḥ śaraṇaṁ suhṛt .prabhavaḥ pralayaḥ sthānaṁ .nidhānaṁ bījam avyayam
9.19		tapāmy aham ahaṁ varṣaṁ .nigṛhṇāmy utsṛjāmi ca .amṛtaṁ caiva mṛtyuś ca .sad asac cāham arjuna
9.20		trai-vidyā māṁ soma-pāḥ pūta-pāpā .yajñair iṣṭvā svar-gatiṁ prārthayante .te puṇyam āsādya surendra-lokam .aśnanti divyān divi deva-bhogān
9.21		te taṁ bhuktvā svarga-lokaṁ viśālaṁ .kṣīṇe puṇye martya-lokaṁ viśanti .evaṁ trayī-dharmam anuprapannā .gatāgataṁ kāma-kāmā labhante
9.22		ananyāś cintayanto māṁ .ye janāḥ paryupāsate .teṣāṁ nityābhiyuktānāṁ .yoga-kṣemaṁ vahāmy aham
9.23		ye ’py anya-devatā-bhaktā .yajante śraddhayānvitāḥ .te ’pi mām eva kaunteya .yajanty avidhi-pūrvakam
9.24		ahaṁ hi sarva-yajñānāṁ .bhoktā ca prabhur eva ca .na tu mām abhijānanti .tattvenātaś cyavanti te
9.25		yānti deva-vratā devān .pitṝn yānti pitṛ-vratāḥ .bhūtāni yānti bhūtejyā .yānti mad-yājino ’pi mām
9.26		patraṁ puṣpaṁ phalaṁ toyaṁ .yo me bhaktyā prayacchati .tad ahaṁ bhakty-upahṛtam .aśnāmi prayatātmanaḥ
9.27		yat karoṣi yad aśnāsi .yaj juhoṣi dadāsi yat .yat tapasyasi kaunteya .tat kuruṣva mad-arpaṇam
9.28		śubhāśubha-phalair evaṁ .mokṣyase karma-bandhanaiḥ .sannyāsa-yoga-yuktātmā .vimukto mām upaiṣyasi
9.29		samo ’haṁ sarva-bhūteṣu .na me dveṣyo ’sti na priyaḥ .ye bhajanti tu māṁ bhaktyā .mayi te teṣu cāpy aham
9.30		api cet su-durācāro .bhajate mām ananya-bhāk .sādhur eva sa mantavyaḥ .samyag vyavasito hi saḥ
9.31		kṣipraṁ bhavati dharmātmā .śaśvac-chāntiṁ nigacchati .kaunteya pratijānīhi .na me bhaktaḥ praṇaśyati
9.32		māṁ hi pārtha vyapāśritya .ye ’pi syuḥ pāpa-yonayaḥ .striyo vaiśyās tathā śūdrās .te ’pi yānti parāṁ gatim
9.33		kiṁ punar brāhmaṇāḥ puṇyā .bhaktā rājarṣayas tathā .anityam asukhaṁ lokam .imaṁ prāpya bhajasva mām
9.34		man-manā bhava mad-bhakto .mad-yājī māṁ namaskuru .mām evaiṣyasi yuktvaivam .ātmānaṁ mat-parāyaṇaḥ


Biblioteca Início Śrīla Prabhupāda ISKCON Idiomas English Español Pусский Português English - Español English - Pусский English - Português Español - Pусский Español - Português Pусский - Português Autores Livros Básicos Referenciados Ensaios Narrativas dos Ācaryas Filosófico dos Ācaryas Por Śrīla Prabhupāda Os Grandes Clássicos Sobre Śrīla Prabhupāda Narrativas dos discípulos de Prabhupāda Filosóficos dos discípulos de Prabhupāda Publicação de jornal Biblioteca inteira Sitios ISKCON Virtual Temple Istagosthi Virtual Calendário Vaiṣṇava Kṛṣṇa West